我係葡萄牙Fans？定係C朗Fans？其實只係因為件衫有型，又有Ｄ意義。OK我認睇C朗著個件波衫好型，我買S碼，結果著係身發覺都係Hip Hop衫。
2012年初夏，我在遊走歐洲。歐洲的初夏極是溫暖舒服，賤內嗜睡，攤草地曬太陽就過了一個下午。而晚上活動，歐洲人來來去去都係飲酒，當時仲要係德國，啱哂我！但係要賤內晚晚陪我飲啤酒，就要少少技巧。
適逢2012歐洲國家盃，夜晚去當地小酒吧，例牌直播緊比賽。我唔係一個真正嘅Foobtall fans，不過歐洲全民皆Fans，氣氛真係好好，而且睇波唔洗好似係香港咁捱到深夜，真係齊哂天時地利。
賤內都係女人，都一定會問咩係「越位」。不過佢係聰明嘅女人，同我睇幾晚比賽就睇得明－－當然，最重要都係我解釋得好。喺德國個陣，德國場場贏波，身邊嘅德國人大肆慶祝，笑得開懷，民居曾經先傳來炮仗聲之後變消防車聲。原來足球會令所有人和物都變得咁可愛！賤內睇得開心，梗係晚晚同我飲啤酒啦。
為左令佢更熱愛足球，我介紹佢睇C朗，因為我冇聽過一個女人話唔鐘意C朗。正式來講，我係介紹佢睇「C朗的插水」。一個咁靚仔，Gel到個頭咁油嘅大男人，昂藏六尺一、二，俾人掂一掂隻腳，就打四、五個跟斗－－你就明白，佢Gel個咁嘅頭，因為佢覺得自己係影帝。
係威尼斯嘅一晚，咁啱就係葡萄牙打捷克，就係紅綠色十字架波衫。「嗱……你睇，又跌啦又跌啦。」「開親自由球都係俾佢直接射，無限開火權但係射極都唔入。」賤內一路睇一路High，我就一路笑笑口飲啤酒。走過威尼斯一條又一條嘅小巷，夜晚有個可愛女人陪你飲酒，真係醉人。
從此以後佢就特別鍾意小酒吧，到依家偶爾都飲返半杯，食吓薯條。對於蒲開嘅紅男綠女，我地呢Ｄ簡直係安靜生活，揀酒吧都要揀間靜Ｄ嘅。但係對我來講，呢個簡直係一個achievement。將一個女人帶入另一種生活，原本淨係識食生勾勾三文魚，變到識飲Kölsch、仲會陪你睇波！唔會再問「十幾人追住個波做乜」！而一切都係由Euro Cup 同Ｃ朗送俾我嘅，係咪好值得紀念先？
14年世界盃佢可能興奮過我，但係就爆冷爆到佢心灰意冷。冇計，當你成為比Lulu更強勁嘅燈神，開金口撐邊隊邊隊死，真神人也。其實我唔care，我都係一路笑笑口飲啤酒，大佬百佳都有Erdinger，仲講？飲啦。
samping loves my jersey
題外話，當巴神、C朗、Benz馬都冇得睇，我就知我淨係想睇阿根廷拎冠軍。球王美斯爭世界杯冠軍就拎哂一個足球員可以拎到嘅所有最高殊榮！能夠見證，有今生冇來世呀！阿根廷一陣GOGOGO！
沒有留言:
張貼留言